<South of the Border> 係一個墨西哥主題樂園咁嘅休息站.
佢嘅吉祥物係個叫做Pedro嘅墨西哥人.
曾經有爭議話呢個公仔帶種族歧視成分, 我就覺得咩都有得講架啦~
咁佢都幾得意吖, 又冇惡意醜化, 又唔使咁敏感嘅~
顧名思義, <South of the Border> 位處南卡與北卡 邊界以南,
由於佢位置優越 (喺正Interstate I-95旁邊), 無論你北上南下,
旁邊都有成幾個exit可以畀你去到呢個"國度"~~
了解番少少個背景: 其實呢個"休息站"喺差唔多六十年前誕生.
當時本來係得間小店, 慢慢開始開下多啲, 開下多啲,
後來個店主仲收到風將會起 interstate, 都係嗰啲老生常談:
權力鬥爭嘅遊戲, 最後interstate 起咗喺呢個主題休息站旁,
而本來設計會繞過另外嗰幾個小鎮就因為冇咗條interstate,
啲車唔再經過佢哋嘅小鎮, 慢慢啲店都摺埋咗嘞~
真係個好好嘅Sustainable Tourism嘅counter example!
因為呢個咁嘅人造旅遊景點, 搞到本來嘅小鎮生意都冇晒.
講番個主題休息站, 佢有餐廳, 有廁所, 有個爬蟲館, 有機舖, 有motel....etc.
但我哋就淨係用咗一吓佢個洗手間, 同埋行咗吓佢賣劣質手信嘅舖頭.
入到去唔睇啲英文真係以為自己去咗深水埗福榮街或者返咗大陸!!
嗰啲飾物雖然部份真係Native American 做, 賣得貴少少,
但其他絕大部份都係廉價嘅中國製造塑膠玩具或者飾品!
不過當中都不乏啲好有創意又搞笑嘅嘢~~ 😂
作為一個有特色嘅中途站, 落車影下相, 行下舒展筋骨都唔錯嘅~
橫掂入去停低係免費嘅, 唔使人場費, 除非你去參觀佢啲館或者打機咁~
我個人就唔建議喺呢度花大錢喇~ 都feel 到佢幾伏, 專劏遊客咁~
如果下次有機會plan 南卡北卡之旅時, 不妨停低半個鐘, 走個圈吖~
沒有留言:
發佈留言